हंगकंग नेपाली सम्वाददाता
जुलाई ३, हंगकंग ।
गत विहिबारको साउथ चाइना मर्निंग पोष्टमा दिइए अनुसार हंगकंग एकिकृत नेपाली समाजका अध्यक्ष बुद्दि बहादुर थापालाई उनले नेपाली समुदायलाई पुर्याएको सेवा वापत सम्मान प्रकट गरेको जनाइएको छ।
यो वर्ष हंगकंगका विभिन्न क्षेत्रमा योगदान गरे वापत सम्मान पाउने करीब ३०६ जना व्यक्तिहरू मध्ये नेपाली समुदायबाट बुद्दि बहादुर थापा मात्र परेका छन्। नेपालबाट प्रकाशित हुने नागरिक दैनिकका अनुसार हंगकंगमा नेपालीहरूलाई दिइएको यो सबैभन्दा उच्च सम्मानको पदक भएको बताइएको छ। यस अघि पुष्पा गुरूंग र नेदरसोल कम्यूनिटी हेल्थ सर्भिसकी डा. शर्मिला गुरूंगले पनि भिन्न प्रकृतिको सम्मान पाइसकेका छन्।
यसपटकको सम्मान प्राप्त गर्नेमा हंगकंगका अल्पसंख्यक समुदायबाट २ जना मात्र व्यक्तित्वहरू परेको जनाइएको छ। लामो समयदेखि कानुनी पेशामा सेवारत भारतीय मूलकी बासिन्दा बन्दना रजवनीले "चिफ एक्जिक्यूटिभज कमेन्डेसन फर कम्यूनिटी सर्भिस" नामक सम्मान पाएकी छिन्। बन्दना रजवनी हंगकंगको जातिय भेदभाव विरूद्दको कानुन ल्याउनमा अहम भूमिका खेल्ने स्थानीय वकिलहरूमा पर्छिन्।बुद्दि बहादुर थापा हंगकंग एकिकृत नेपाली समाजको अध्यक्ष रही विगत ६ वर्षदेखि कार्यरत छन्। उनकै नेतृत्वमा नेपाली समुदायिक सहयोग समूह संचालनमा रहेको छ। जसको लागि हंगकंग सरकारले विगत ३ वर्षदेखि आर्थिक अनुदान प्रदान गरिरहेको छ।
समाजले नेपालीहरूसंग सम्बन्धित विभिन्न सामाजिक सेवाहरू लगायत नेपालीहरूको लागि भाषा अनुवादका सेवाहरू पनि प्रदान गर्दै आएको छ।
