लव के. बुढामगर
न्यूयोर्क, जुन ६। लांघाली परिवार यू.एस.ए. ले मेरिल्याण्ड राज्यको बाल्टिमोर शहरमा गत आइतबार, मे ३० मा एक विविध साँस्कृतिक कार्यक्रम तथा पाँचौं दोहोरी साँझ २०१० को आयोजना गर्यो।
गायक तथा संगीतकार खेम संग्रौला, टिका कुमार पुनमगर, अनिता लामिछाने, राजेश थापामगर, दीपा थापा, मंजु पुनमगर, न्हुच्छे नारायण डंगोल र सचिन रोकामगरले स्वर्गीय अरुण थापामगर द्वारा स्वरवद्ध "करोडौ मुटुहरुको ढुकढुकी नेपाल, न तिमी हुन्थ्यौ न म हुन्थें नभए नेपाल" राष्ट्रिय गीत गाएर साँस्कृतिक कार्यक्रमको शुरुवात गर्नु भएको थियो।
गायनतर्फ राजेश थापामगर र अनिता लामिछानेले "सागरसरी चोखो माया", यशोधा खालिंग राईले "तिर्खा लाग्यो पानी खाएँ मैले के बिराएँ" र "न बिर्से तिमीलाई", दीपा थापाले "काली पारे दाई कति राम्रो", लोक गायक कुमार थापामगरले "किन लाग्छ मलाई मेरो देशको चिन्ता (देश भक्तिपूर्ण)", र खेम संग्रौला र दीपा थापाले "बन माराले बनै खायो" गीत गाउनु भएको थियो।
त्यस्तै अतिथि कलाकार चर्चित लोक दोहोरी गायक सुमन बुढामगरले "पोइला जान पाम पाम पाम शिव भन्नेलाई मैले ल्याउन पाम" नामक आफ्नो बहुचर्चित लोक गीत र "नानीले दिएको रुमाल त्यो पनि खस्यो हरायो" कौडा (गीत) गाएर सबैलाई नचाउनु भएको थियो।
यसै बीच गायक बुढामगरलाई वहाँले मगर सँस्कृतिको संरक्षण गर्न कौडा गीत र नाँच सम्वन्धी डकुमेन्ट्री बनाउनु भएको तथा गीत लेखन र संगीतको बलियो माध्यमबाट मगरको संस्कृति र पहिचान जोगाउने कार्यमा बिशेष योगदान दिए बापत संस्थाका अध्यक्ष श्री महेन्द्र कुमार थापामगरले सम्मान पत्र र खादा लगाई दिएर उहाँको सम्मान गर्नु भएको थियो।
अर्का अतिथि कलाकार हास्य व्यंग्यकार मनोज गजुरेलले नेपालको वर्तमान राजनैतिक र समसामयिक विषयमा एकल व्यंग कार्यक्रम प्रस्तुत गरेर सबैलाई हँसाउनु भएको थियो भने लोक गायिका रेखा शाहले उँहाको चर्चित लोक गीत "सिमसिमे पानीमा" र "मन पर्ने एउटा भेना छ" गीत गायक राजेश थापामगर संग गाउनु भएको थियो।
नृत्य तर्फ संस्थाले आयोजना गरेको पहिलो दोहोरी साँझ २००६ देखि निरन्तर रुपमा आफ्नो जादुगर नाँच प्रस्तुत गर्दै आएकी नृत्यांगना सुश्री बिन्दु थापामगरले यस पटक "दुई चुल्ठी बाटेर" मा एकल र ग्रुपमा कौडा नृत्य गरेकी थिइन्।
नृत्य निर्देशक राज कुमार पुनमगरको निर्देशनमा तयारी सदा झैं यस पटक पनि सबै ग्रुप नृत्यहरु सशक्त थिए। इन्जु तिलिजामागर, इन्दु तिलिजामागर र उषा पुर्जामागरले "माइतीघर", स्वेच्छा बरालले "आज बाह्र हाते पटुकीको", राज कुमार पुनमगर, निलम थापामगर, मित्र कुमार फगामी मगर, इन्द्र राम्जाली मगर, माया (गुरुङ) पुनमगर, मंजु पुनमगर, बिन्दु थापामगर र रोजिला खरेलले "कौडा, सुजु गुरुङ्गले "बैंश फुल्ने विहानीमा", यशोधा खालिंगले "गैरी खेतको", सजनी रोका र शीतल तुलाचनले "माथि माथि सैलुंगेमा", दीवाकर गर्बुजामागर, गोबिन्द फगामीमगर, इन्द्र राम्जालीमगर र मित्र कुमार फगामीमगरले "सालैजो" गीतमा राम्रो नृत्य प्रस्तुत गरेका थिए।
त्यस्तै राजेश थापामगर, मान बहादुर रानामगर, खोम बहादुर थापामगर, माला रानामगर, यशोधा खालिंग राई र कोमल बम्जन तामांगले पूर्वी नेपालको मगर समुदायमा अति लोकप्रिय "हुर्रा नाँच" प्रस्तुत गरेका थिए।
संगीतकार बिष्णु बहादुर पुनमगरको गितार, खोम बहादुर थापामगरको बाँसुरी र नुत्छे नारायण डंगोलको मादल र तबला सहितको छोटो सांगीतिक प्रस्तुतिले दर्शकहरुलाई मन्त्रमुग्ध पारेको थियो।
कार्यक्रमको मुख्य आकर्षणको रुपमा रहेको दोहोरी गीतमा गायक शेर बहादुर थापामगर, राजेश थापामगर, माया पुनमगर र मंजु पुनमगरले पहिलो चरणको र अतिथि लोक दोहोरी गायक सुमन बुढा मगर र मंजु पुनमगर बीचको अन्तिम चरणको दोहोरीले उपस्थित सबै दर्शकहरुलाई रोमान्चित बनाउदै नचाएको थियो। साँस्कृतिक कार्यक्रमको संचालन बहुप्रतिभाका धनी र अमेरिकामा एकदमै लोकप्रिय उदघोषकका रुपमा परिचित टिका कुमार पुनमगरले बडो रोचक ढंगले गर्नु भएको थियो।
अमेरिकामा बसोवास गर्ने मगर समुदायमा सबै भन्दा जेष्ठ नागरिक अर्थात् सदस्य ८३ वर्षीय श्री बेन बहादुर थापामगरले पानसमा बत्ती बाली औपचारिक रुपमा कार्यक्रमको समुदघाटन गरे पछि संस्थाका सचिव मान बहादुर रानामगरले संचालन गर्नु भएको औपचारिक कार्यक्रममा उक्त साँझको संयोजक क्याप्टेन दल बहादुर रोकामगरले स्वागत मन्तब्य, बाल्टिमोर एसोसिएसन अफ नेपालीज इन् अमेरिका (बाना) का अध्यक्ष श्रीमती रबिना थापा, अमेरिका नेपाल सोसाइटीका अध्यक्ष खेम भट्टचन, नेपाल एम्बेसीका प्रथम सचिव आनन्द प्रसाद शर्मा र म्याग्दी समाजका अध्यक्ष पारस मणी श्रेष्ठले कार्यक्रमको सफलताको कामना गर्दै शुभकामना दिनु भएको थियो भने अध्यक्ष महेन्द्र कुमार थापामगरले यस कार्यक्रम सफलताका साथ सम्पन्न गर्न सहयोग गर्नु हुने सबैलाई धन्यवाद दिदै उक्त औपचारिक कार्यक्रमको समापन गर्नु भएको थियो।
स्मरणीय रहोस लांघाली परिवार यू.एस.ए. अमेरिकामा रहेका सम्पूर्ण मगरहरुको साझा संस्था हो जुन सन् २००४ मार्च २८ मा न्यूयोर्क राज्यमा स्थापना भएको थियो। यस संस्थाले विविध साँस्कृतिक कार्यक्रम तथा दोहोरी साँझ २००६, २००७ र २००८ न्यूयोर्कमा, २००९ को न्यूजर्सीमा र २०१० को पहिलो पटक म्यारिल्याण्ड राज्यको बाल्टिमोर शहरमा आयोजना गरेको हो।
फोटो सौजन्य: धन थापामगर (http://www.DhanPhotos.com)
On behalf of the President & Magar Association UK
Nem Thapa Magar
Foreign PR MAUK